من اقوى المحاورات بين مطلق وصياف يرحمهم الله

[المنتحي]

يقول مطلق ( رحمه الله ) ::


السحيمي ينفض اللحية ويطوي في معمه
طار عقله من شليويح المطيري والزلامي


البعير اللي يشيل الحمل عود يرضع أمه
بعد قالوا شامخ النيبان مردوم السنامي



فقال صياف الحربي ( رحمه الله )::


السحيمي يوم غنى حطكم في راس كمه
ثم خلاكم عجينه كن مافيكم عظامي


الجمل يمشي على الدرب وكلامك مايهمه
من هديره قمت من نومك وحرمت المنامي



يقول مطلق ( رحمه الله ) ::


الزمان اللي ستر حالك وحالي لاتذمه
والحرم من دونه المسعى وبيبان السلامي


أنت داب كل ماحرك شدوقه سال سمه
والله إنا مانذوق السم يالداب التهامي



يقول صياف ( رحمه الله )::


أنت ذيب تكره البارود لو إنك تشمه
ماتحب النور الأبيض ماتحب إلا الظلامي


الطعام اللي ليا شفته على صدرك تضمه
لاتقول إنه حلال ولاتقول إنه حرامي



يقول مطلق ( رحمه الله ) ::


علموا صياف لايتبع خفيف الظل عمه
دام أنا وياه فالمذهب وفي الطرقة ليامي


قله إنا مانبالي اللي بنا نقال نمّه
بعد عود بايعة بين القبائل مايسامي



يقول صياف ( رحمه الله )::


أنت أشوفك كل ماتسرح تضوي لك مطمه
تحسد المسلم على دينه ليا صلى وصامي


لايزعلك الكلام اللي عسى ربي يتمه
ثم بده مستريح بلا شراب ولاطعامي



يقول مطلق ( رحمه الله ) ::


كل شئ في طريقك يا أبيض الشارب تخمه
لين ضيعت الفشق والبندقية والحزامي


إن نثرت القش ياصياف ماتقدر تلمه
وإن قربت من العرب ميسمك جوف النار حامي



يقول صياف ( رحمه الله ):::


لو يبي يتركك على باب الخزينه رحت يمه
وإن نظر لك نظره حمراء تعديت النظامي


المسافر مايطب البحر لين إنه يطمه
يذكر الله في بلد مكه ويلبس له إحرامي ,,

[الوافي]

الله يرحم شاعرنا صياف لاشك انه من افضل الشعراء لدي في المحاوره
ولايهون مطلق الشاعر الصنديد
رحمهم الله
وهذا شعر خطير وبطريقه غير مباشره تعزف الكلمات
ليس كمثل محاورات اليوم اللي جات منها مشاكل
ابك الناس يابوفهد ماعاد تعرف شعر الامن رحم الله
قبل مده اسمع لشخص يحاورشخص ويسب قبيلته عينك عين
مماجعل تلك الساحه بركة دماء

[b7r alnda]

رحم الله الشاعرين

كانت المحاوره في ايامهم في اجمل حللها والسبب ان شعراء ذلك الوقت اعطوا المحاوره اصولها

وسلمت يالمنتحي

[شمريه]

.
صح الله السانك ابوي المنتحي ورحم الله الشاعرين بواسع رحمته وغفر لهما اللهم امين

محاوره راقيه وممتعه فعلا.. حتى لو كان فيها ضرب تحت الحزام الا انها بمنتهى الاحترام ...

بوركت يمينك الطيبه
.
.

[كحيلان الهاجري]

.صح الله السانك ابوي المنتحي ورحم الله الشاعرين بواسع رحمته

محاورة صدق جميـــــلة ورآئع

[كحيلان الهاجري]

.صح الله السانك ابوي المنتحي ورحم الله الشاعرين بواسع رحمته

محاورة صدق جميـــــلة ورآئع